Rauðir skór á föstudegi

Ég valdi rauðu skóna mína í morgun til að ganga í til vinnu. Ég leit á merkið inni í skónum og sá að þeir eru frá tískuhönnuðinum Paul Smith. Þetta voru skórnir til að ganga í sólskini til vinnu. Ég þekki ekki Paul Smith og veit ekki einu sinni hvort hann er góður skóhönnuður. En skórnir eru léttir og auðvelt að ganga í þeim stuttar vegalengdir.

Á leiðinni eftir Lindevej sem ég geng allaf þegar ég fer á skrifstofuna kom margt í huga mér

  1. Ég hugsaði um fótboltaleikinn sem ég spilaði í gær. Við unnum Hillerød, liðið sem þegar hefur tryggt sér deildarmeistaratitilinn í ár. Þetta var einn besti leikur liðsins okkar, við vorum einbeittir og harðir. Ég fékk gult spjald fyrir eina af mínum  tæklingum. Ég fæ ekki oft gult spjald.
  2. Ég hugsaði um símtal sem ég átti við Kaldal í gær.
  3. Ég hugsaði um ferð mína til Íslands næstkomandi fimmtudag og þau verkefni sem ég hef í Íslandsferðinni … byggingarframkvæmdir, vegabréfsstúss, bankastúss, lögfræðingastúss…
  4. Ég hugsaði um myndband sem ég sá af Styrmi á hjóli í gær
  5. Ég hugsaði um íslensku skáldsöguna sem ég las í vikunni. Hún var frekar skemmtileg. Var einskonar autofiction, næstum eins og samsett blogginnlegg. Minnti að sum leyti á Knausgaard Min kamp. Kannski tókst höfundinum ekki á sama hátt að gera ómerkilega hluti mikilvæga. Hjá Knausgaard er á vissan hátt allt lagt undir. Bara að lesa lýsingar Knausgaards á göngu sinni  með barnavagn meðfram umferðargötu verður á einhvern hátt spennandi.
  6. Ég hugsaði um fólkið sem ætlar að koma í kvöld í pizzu til okkar og hvort ég þyrfti að höggva meiri eldavið fyrir pizzaofninn.
  7. Ég hugsaði um þá tölvupósta sem ég þyrfti að senda … og fór að hafa áhyggjur af tölvupóstum sem ég sendi fyrr í vikunni og hef ekki fengið svar við.

 

dagbók

Skildu eftir svar