Espergærde. Listi yfir horfna hluti

Ég er dálítið fúll yfir því að japanski úrvalskrimminn Hinn grunaði hr. X  eftir  Keigo Higashino er ekki almennilega kominn í gang á hinum íslenska kiljumarkaði. Ég sá að bókin var númer 10 á metsölulista Eymundsson og það er alls ekki nógu gott þegar slíkur eðalkrimmi er settur á markað.  Kolbrún Bergþórsdóttir, sem er sennilega sá gagnrýnandi sem almenningur tekur mest mark á, var ansi hrifinn af bókinni. Hún skrifaði um hana í Fréttablaðinu. Ekki kæmi mér á óvart að hún veldi hana sem glæpasögu ársins þegar útgáfuárið verður gert upp. (En hugsa sér að það hefur enginn annar minnst opinberlega á þessa góðu bók.)

Ég er alltaf að gera lista, ég á lista yfir allt, just name it.

Listi yfir það sem hefur horfið og kemur kannski aftur:

  1. Bros Macrons eftir sigur Frakklands í heimsmeistarakeppninni í fótbolta
  2. Ryðsveppaplágan sem herjaði á Keflavík í byrjun þessarar aldar
  3. Nú er horfið norðurland
  4. Tindátar. Hermenn steyptir úr tini
  5. Alvöru diskódans
  6. ÁTVR á Lindargötu og þunnhærði starfsmaður búðarinnar
  7. Sunsip djús
  8. Hillary Clinton og hvíta buxnadragtin hennar
  9. Gamla flugstöðin í Keflavík. Hvað varð af henni?
  10. Normalbrauð frá bakaranum í Starmýri sem er líka horfinn. Hvort var það normalbrauðið eða bakarinn sem hvarf fyrst?
  11. Verslunin Víðir sem einu sinni var aðalbúðin í Starmýrinni hefur horfið tvisvar. Nýtt hvarfmet.
  12. Varðskipið Árvakur sem var alltaf uppáhalds varðskipið mitt af því það var svo lítið. Davíð á móti Golíat í þorskastríðinu.
  13. Hvert er horfið laufið sem var grænt í gær?
  14. Uma Thurman. Eða birtist hún aftur með #metoo?
  15. Tímaritið Nýtt líf og tímaritaforlagið Fróði. Ég var alveg búinn að gleyma því forlagi. Sennilega af því að það er horfið.

ps. Kem til Íslands á morgun og þeir sem ekki vilja verða á vegi mínum haldi sig frá vesturbæ, miðborg og Hvalfirði fram á sunnudagskvöld.

pps. Það eru epli á leið minni til vinnu. Ég tíni mér eitt á hverju morgni.

IMG_0709

dagbók

Skildu eftir svar