Espergærde. Hæka á dag. Alla daga ársins.

Ég hitti mann í dag sem ég kannast við. Ég hafði séð hann útundan mér þar sem hann kom gangandi niður lítinn skógarstíg með fangið fullt af kössum. Þar sem ég var með Öglu og Mónu á leið niður á strönd, og þær voru óþolinmóðar að komast í sjóinn, ákvað ég að staldra ekki við þótt ég sæi á svip mannsins að hann vildi tala við mig. Það var líka greinilegt að hann greikkaði sporið því ég var varla búinn að sveigja niður á Strandvejen þegar maðurinn stendur allt í einu móður og másandi mér við hlið, með þessa hálfþungu kassa í fanginu.

„Hej, Zlatan,“ segir hann og reynir að halda mæðinni niðri.
„Hæ,“ segi ég. En ég vildi auðvitað ekki vera afundinn og leiðinlegur þótt ég væri að flýta mér og því spurði ég hvað hann væri að burðast með. Og þarna hitti ég sennilega á þá spurningu sem hann var að vonast eftir því hann ljómaði og flissaði á milli þess sem hann reyndi að ná andanum fyrir mæði.
„Já,“ sagði hann og gat eiginlega ekki varist hlátri. „Já, ha ha ha, þetta er nú svolítið sem ég var að bauka við allt síðasta ár. Og nú hef ég þetta í kössunum hérna.“ Og svo nam hann staðar og lagði kassana niður á steinsteypt handrið við hlið gangstéttarinnar. „Sjáðu,“ sagði hann og opnaði einn kassann.

Ég gerði manninum þann greiða að líta ofan í kassann sem var fullur af bókum. Að minnsta kosti 50 eintök af sömu bókinni. „Ég er búinn að skrifa bók og ég var að fá hana úr prentun. Mér datt nefnilega í hug að skrifa eina hæku fyrir hvern dag ársins 2018. Einskonar dagbók. Sjáðu …“ Hann opnaði bókina og lenti fyrir tilviljun á fyrsta nóvember:2018

  1. nóvember
    Venstre øre varmt
    vi er vækselvarme dyr
    Højre øre koldt

„Enn fínt,“ sagði ég. „Mætti ég kaupa eitt eintak,“ spurði ég og hafði einlægan áhuga á bókinni því mér fannst hugmyndin góð.

Þegar ég kom heim í kvöld eftir strandtúrinn og aðra túra í dag fletti ég upp á 1. nóvember 2018 í dagbókinni minni til samanburðar. Þar stendur:

„ … Að þessu tilefni gerði ég tvennt í morgun 1) ég tók sjálfsmynd

IMG_2783

og 2) á skrifstofunni tók ég rækilega til. Þurrkaði af borðum, henti óþörfum pappírum í ruslið og svona. Yo!

Ný tímaskeið eru alltaf afmörkuð með myndatöku og tiltekt; taka mynd, taka til.“

Þetta var mín hæka þann þann 1. nóv. ’18

dagbók

Skildu eftir svar

This site uses Akismet to reduce spam. Learn how your comment data is processed.