Ég ætlaði að hlusta á útvarpsþáttinn Bara bækur á morgunhlaupinu. Af einhverjum ástæðum var laugardagsþátturinn enn ekki kominn inn á hlaðvarp útvarpsins þegar ég hafði reimað á mig hlaupaskóna. Þess vegna sneri ég mér þess í stað að menningarþættinum Lestinni. Ekki veit ég hvort þetta var nýjasti Lestar-þátturinn eða bara einhver eldri útsending valin af tilviljun en ég viðurkenni það hér og nú að ég gat einungis hlustað í tíu mínútur eða svo. Þegar þau sem töluðu saman í þættinum sögðu í þriðja sinn: „…hvernig segir maður það aftur á íslensku …“ gat ég ekki meira og slökkti. Afsakið viðkvæmnina.