Ef það skyldi hafa farið framhjá Kaktus-lesendum er ég fús til að endurtaka spekina; árið 2023 er skilgreint sem ár stuttu bókanna. Bókmenntaiðnaðurinn hefur allt í einu skilið að einbeitingarhæfni lesenda fer síminnkandi og 400 síðna bók er nú mörgum nútímalesanda ofvaxið lesverkefni.
Í ár hafa bækur írska höfundarins Claire Keegan (sem eru örstuttar) eins og Smámunir sem þessir fangað athygli lesenda og bókakaupenda. Claire Keegan hefur skrifað 5 bækur á ferlinum og ef maður leggur þær allar saman ná þær ekki samanlagt 700 blaðsíðna lengd.
„Ég held mjög upp á að nota orð sparlega. Fágun er að segja akkúrat nógu mikið og láta lesendur sjálfa um að fylla upp í myndina,“ segir Claire í viðtali við The Guardian. Aðrar vinsælar stuttar bækur eru skáldverk Annie Ernoux (bækurnar eru örstuttar, sumar innan við 100 síður) Staðurinn, Ungi maðurinn, Kona og bækur Fleur Jaeggy, til dæmis Sælureitur agans (örstutt, 138 bls.). Allt eru þetta bækur sem hafa algerlega slegið í gegn bæði á Íslandi og ekki síður úti í hinum stóra heimi. Að minnsta kosti er endurnýjaður áhugi á bókum sem hægt er að lesa á einum degi eða nota innan við 4 kls. til að klára að hlusta.
Og á sama tíma er það er orðið aldeilis „out“ (eða óyfirstíganlegt) að lesa hinar löngu skáldsögur: Tolstoj (Stríð og friður í 4 bindum, out). Anna Karenína í 4 bindum, out). Dostojevskí (Glæpur og refsing meira en 400 síður, out) og … hér má setji inn allar skáldsögur sem skríða yfir 400 síður.
Innan úr ritstjórnarherbergjum hinna íslensku forlaga (og ekki bara íslenskra) heyrast þær háværu raddir að höfundar eigi að fækka orðum, fækka blaðsíðum, fækka köflum. Bækur sem eru yfir 400 síður eru miskunnarlaust styttar niður í 296 bls. (300 síður er nýja dauðalínan).
Hægt er með góðum vilja að segja að útgáfa Klettsins eftir Sverri Norland marki upphaf jólaflóðsins í ár; 2023. Útgáfudagur var 6. september og höfundur slær hárréttan tón í byrjun vertíðar og leggur línurnar. Bókin er nefnilega stutt, nákvæmlega 212 blaðsíður.